- بدي احكي يا سورية و شو كتير الحكي

- بدي احكي يا سورية و شو كتير الحكيبدي احكي يا سورية و شو كتير الحكي... بدي احكي يا سورية و شو بيوجع الحكي... بدي احكي يا إمي و عصدرك اتكي... بدي احكي يا إمي قوليلي شو بكي... يا سورية ردي، قوليلي شو بكي... يا سورية يا إمي بكفي بكي... بدي احكيلك يا إمي حكاية وطن... هالوطن إمي و أبي، أخي و رفيقي و ابني... حكاية وطن بدمنا و بعروقنا اسمو كتبنا...
حكاية وطن عايش فينا... حكاية وطن موجوع.....
سورية انتي اغلا و اكبر من الكل ......ولاء كنيــــفاتي

لن تأخذ من وقتك دقائق..
رائعة جدا تستحق القراﺀة والنشر..

بعد عامين ونصف من الأزمة السورية أستنتجنا مايلي..

خسرنا كتير من رفقاتنا بسبب مواقفنا حيال هالأزمة

نصف الشعب بالتمام كره بعضو البعض

تجار الأزمة لعبت فينا متل الطابة وشردونا

معظم الطبقات الأجتماعية خسرت أموالها وشقى عمرها وصفت عالحديدة

كترت مظاهر السلب والعنف والفلتان الأمني

التاجر اللي اشترى بضاعتو ايام زمان أنسرقت هلأ ورجع يشتريها ويلمها من السوق

كل بيت بسوريا خسر ومعظمهم خسارة بالأرواح

صرنا نقتل بعض وهاد ببنبسط لجماعتو وهاد مبسوط لجماعتو والغرب والخارج مكيفين علينا رجعونا ل 100 سنة لورا

الرفيق اللي متحيز لطرف صار يطلب راس رفيقو لأنو بالطرف التاني ونسيو أيام زمان لما كانو يلعبو طابة بالحارة ويفطرو ويتغدو سوا وكان يشتغلو سوا

خسرنا كل اشي اسمو مواد غذائية أساسية وخاصةً للأطفال والسبب الجشع والنفاق وأنعدام الأخلاق

ولك حتى برمضان صارت ناس تصوم على رأي طرف وناس على رأي طرف تاني

أيام العيد كنا نشوف الولاد من صباحية العيد لابسين احلى تياب ومجهزين حالن لحتى يطلعو مشاوير أو يروحو يلعبو بمدينة الملاهي وهلأ الولاد صارو مشردين

خسرنا ايام المدارس والولاد نسيت شو يعني علم وصارت غرقانة بالجهل

خسرنا التجوال بمعظم مناطق المدينة وصارت كلها حواجز وشي بينزل صاروخ وشي بصير اشتباك

خسرنا كلمة رفاهية أو مشوار أو سفر

خسرنا كلمة أخوي ورفيقي وكلمة شريك وعوضونا فيها بالشتم والمسبات وابحقد والغل الداخلي

خسرنا أيام الجيش لما كان رفيقك على يمينك مسيحي واللي على يسارك درزي وانت بتقضي عسكريتك وبتخلص وبعدها بتعرف انو هدول من غير طائفة وبتتذكر كيف كنتو تاكلو سوا وتتعاقبو سوا وتنزلو اجازة سوا وتتسرحو سوا وهلأ صار كمين بيقتل الكل وبيغتالو الكل

خسرنا كل شي وبالأخير لحد هلأ نحن مو مقتنعين أنو أزمتنا مو أزمة أسقاط نظام أو ربيع عربي أو حرية
أزمتنا دولية وأستكلاب على البلد وخيرات البلد وموقع البلد وجغرافية البلد والعالم كلو مبسوط فينا وشمتان فينا وعم يحركونا متل الألعاب ونحن مبسوطين وعم نهلهل

بالأخير رح قول هالكلمة ... ياريت تأثر بنفوسنا

يا جماعة نحن أخوة نحن سوريين نحن ولاد بلد وحدة ولاد حارة وحدة نحن أمنا سوريا ربتنا وكبرتنا حرررام نقتل بعضنا حررام يا شباب اخ عم يقتل اخوه واخ عم يدبح اخوه
خلونا نوقف الزمن شوي ونرجع لورا ونحس بقيمة هالبلد ونحس بقيمة أروحنا ودم هالبشر اللي صار برقبتنا جميعاً ليوم الدين

خلونا نحس بهالأم سوريا يلي عم تبكي باليوم مية مرة على فراق ولادها
مالنا غيرك يارب .. رحمتك يارب..

sameer shaaban .:. 2013-07-02

عنوان التعليق*:

اسم الكاتب*:

نص التعليق*: