القائمة الرئيسية
RSS
الارشيف
االشريط الاخباري
تصويت
ما الذي يشدك الى الموقع
محرر اونلاين
اعزائي زوار الموقع اتمنى واياكم عاماً ملؤه السلام والامان والتعالي على الجراح .
القائمة البريدية
اكثر المقالات قراءة
حديث نسوان
( تكاليف يوم العرس )
مع إطلالة شمس الصيف المحرقة ودخول النهار نصفه الأول وتعالي أصوات الباعة المتجولين في شوارعنا تتقدم ام سهيل من باب بيتها ولا تكاد تضع فيه مفتاح الدار الذي طالما خبأته بالمكان المعهود الذي يمكن ان تعرفه كل النساء
وفجأة تطل عليها جارتها التي لم تفارقها طيلة أربعين سنه من خلف نافذة بيتها التي ومازالت تطل على بيت ام سهيل أيضا منذ أربعين سنه.
فمن هذا الحي ومن ذلك البيت تربيتا وعاشتا فترة الطفولة والصبا و الشباب وفي تلك الأروقة المتجددة خرجتا فتاتين نضرتين متحابتين .
ومن رجولة تلك الأرض تزوجتا من رجلين مازالا متمسكين بعادتنا القروية الاصيله .
- أم الياس : صباح الخير يا تقبريني
- أم سهل : صباح النور
- أم الياس : مبكرة وين يا مسهل من الصبح وين كاينه
- ام سهيل : والله رحت جبت شوية غراض بكير ومرقت على سلفتي قال شو بدها تجوز ابنها الشهر الجايه
- ام الياس : يي هالفصعون صار بدو يتجوز ليش قديش صار عمرو
- أم سهيل : لك شو فصعون صار شب مشورب خزات العين تخرج وراح على الجيش وتوظف وبدها تجوزو
- أم الياس : طيب طيب حطي الغراض واطلعي نشرب قهوة
- أم سهيل : جايه يالله بس لجيب هالفصوليات تساعديني على تقطيعهن لأنو معلومك بدي اطبخ بكير اليوم .
تدخل ام سهيل من باب الدار وكعادتها تخلع حذائها خارجا وتتقدم بلطف لكي لا تزعج من في البيت.
- أم سهيل : وينك
- أم الياس : هون هون فوتي على الصالون جايه لجيب القهوة .
أم الياس تدخل حاملة صينية القهوة ومعها صحن يحوي قليلا من قطع الحلوة (( سابليه ))
- أم الياس : شو بدها تكنن سلفتك ومين هي صاحبة النصيب الى بدو ياها انشاء الله تكون من صحنايا وما يكون بدو يجيب حدا من برا لأنو هالايام كلو بيروج بيجيب من برات شواقه(( نهر في صحنايا القديمه / الله يرحم /
- أم سهيل : لا يختي ما حدا غريب بتكون بنت عمت امها لسلفتي بتقربهن من بعيد شوي بنت الشيخ.. (( فضل عدم ذكر الاسم للاحترام )) إذا بتعرفها .
- أم الياس : يه هي امها (( فلانه )) اللي كانت معنا بالصف .
- أم سهيل : لك ايه اللي كان (( فلان )) بدو ايها من زمان هههههه .
- أم الياس : ايه الله يتمم بخير – ودخلك وين بدها تجوزو بعرف بيتهن صغير
- أم سهيل : لك يختي مهنن عمرو السطح السنه الماضيه وعملولو غرفتين وبيت مي ( توليت ) ومطبخ وحمام
- أم الياس : اه وانشاء الله شغلو منيح هالصبي لاني ما بعرفو غير ولد بيلعب بالحارة واجريه مقحوطين
- أم سهيل : لا لا شغلو كتير منح ومجهز حالو من مجميعو يقبر امو شغيل وكسيب
- أم الياس : الله يقويه ولا يضع تعب حدا .
وما هي إلا لحظات وتدخل هاله بنت ام الياس وهي تفرك عينيها بيدها ..وشعرها المنكوش يعلو رأسها المستدير
- هاله : صباح الخير
- أم سهيل/ ام الياس : صباح النور .
وبدون تردد تهزج أم الياس بمشاركة ام سهيل وتقول : اييها : عقبال فرحتك هاله بالله كلكن قولو
اييها : شو هالغزال الذي زينو طولو
اييها : و التم خاتم دهب محبوك باللولو
اييها : ايها عقبال لعرسك واخواتك يغنولك ................
- هاله : خير مين الى بدو يتجوز على الصبح
- أم الياس : لك مو رفيقتك بنت (( فلانه )) من عمرك انا بعرف قال ابن فلان بدو ياخدها
- هاله : ايه الله يوفق ووين عاملين العرس بأي صالة ومين المطرب اللي جايبينو و دخلك شو السيارة اللي جايبها يعني مش لازم ترضى بأقل من مرسيدس وبعدين فستان العروس وين عاملتو وقديش مكلف وين بدها تعمل شعراتها وبعد العرس وين رايحين انشاء الله على تركيا يييي كل الناس صارو يروحو هونيك ولا على مصر و.....و.....و.....و.....و....
- أم الياس : يبعتلك يبعتلك شو بالعة راديو على الصبح شو صرلك
- أم سهيل : تركيها يختي تحكي لانو بنات هالايام ما عاد يعجبهن اللي كان يعجبنا ..... بزمناتي اخدني عمك ابو سهيل بمبرومه و سكربينه ( حذاء للنساء ) شغل ايد وفستان مخمل ازرق وصندوق خشب وعراضه للشباب وخلصنا .....
- ام الياس : شفتي شفتي بنات هالايام شو بيفكرو بزماننا ما كان في هالشي كلو
كان الى بيهم الرجال شو بيشتغل تعيب ولا عونطجي - سمعتو كيف والسكن عند اهلو أحسن
- هاله : بس يا امي الزمن تغير.
- أم الياس : ويتغير.... انا بعرف بيتغير للأحسن مش لهيك شغلات وبعدين الله يعين العريس اذا كان هيك بدو يعمل بالعرس مهو بيكون يادوب مأمن البيت اذا ما كان بالإيجار... ويادوبو اخد قرض على راتبو لحتى يقدر يتجوز.
- أم سهيل : يا عمتي يا تقبري عداكي اذا كل البنات بدهن يفكرو متل ما عم تحكي معناتو ما في ولا بنت بدها تتجوز ....منشان هيك لازم بناتنا يبطلو يتطلبو على هالشباب الى مش عارفين يلاقوها من وين ولا منوين
- هاله : بس يا امي .. يا عمتي
- أم الياس : لا بس ولا شي قومي سدي.........(شتيمه مخففه ) وروحي غسلي هالوجه وارجعي
تخرج هاله وهي مستاءة من كلام أمها والجارة ام سهيل........
- أم سهيل : ياويلي على بنات هالايام كيف ما حركو بدهن الشب يكون متل البرود يعني بدهن ياه بنك
- أم الياس : بس بيني وبينك كل بنت بتحب يصرلها هالشي وليش ما يصرلها وليش ما تطلب شو عليه وشو ناقصها مهي بناتنا معلمه وحلوى وفهمانه ومش ناقصهن شي يعني مكملين من كل شي.
- أم سهيل : يختي يطلبو مش عم نقول ما يطلبو بس بالشي المعقول يعني شوي شوي
- أم الياس : ايههههههه صقله أيامنا بتذكر يا دوب بالخطبه اخدني خيك ابو الياس على الشام اكلنا بوظه ورجعنا ..ههههههههه...
- شربي شربي قهوتك بردت
وما زالت الحكاية مستمرة
أرجو ابداء الرأي في تكاليف العرس في ايامنا هذه // اسف للغلة المكتوب فيها المقال لكني اتوخى الكتابه بلغتنا لانقل الصورة كما هي .
SHADY
التعليقات
والله معك حق يا شادي والله يعين شباب هل الايام على مصاريف العرس
حلو
فاتن عبيد كندا