صحناويات (حديث نسوان )

أم الياس : ميلي شربي فنجان قهوة او كاسة متى هيك هيك لرجال راحو على الشغل .

حديث نسوان

 أم الياس :   صباح الخير يختي

ام سهيل  :   صباح النور

أم الياس :          ميلي شربي فنجان قهوة او كاسة متى هيك هيك لرجال راحو على الشغل .

ام سهيل :    يلا جاي بس لاشطف ارض الدار شوي ورش مي قدام الباب.

وبعد قليل دخلت  ام سهيل الى بيت أم الياس وكانت صينية المتى حاضرة متل العاده   

أم الياس :   سمعتي شو عم يقولو الناس.

ام سهيل :    شو

أم الياس :   قال ابني امبارح انو بدهن يسكرو المدرسة تبعهن شي اسبوع مشان يعقموها مدري يطهروها  

ام سهيل :    وليش بدهن يعقموها اشو هي مستشفى ولا مستوصف

أم الياس :   ولك لا هي عم يقولو انو في مرض اسمو رشح الخنازير

ام سهيل : ولك ايه سمعت عنو بالتلفزيون من يومين كنت قاعدة انا وابو سهيل وطلعو بالاخبار عم يحكو عنو قال انو صار قاتلو شي 1000 زلمة بالعالم وبعدهن ما لقو حتى يقتلو .// دخلك وشو جابة لعنا هاد.

أم الياس :   ولك هاد مو زلمه هاد مرض وبيجي لعنا من الهوا

ام سهيل :    الهوا قررر يا باري وكيف بالهوا ليش مسموح يفوت لعنا مين مكان وحتى عن طريق الهوا // بيجوز فايت تهريب

أم الياس :   ولك اصحى يجي لعندكن او يجيبو جوزك شي مرة زياره على الدار لانو بيقول اذا فات على شي بيت بيعدي كل البيت وبيصيرو كلهن مرضانين.

ام سهيل :    يا سيــد ..... (   للتكني بأحد الانبياء ) اله يجيرنا

وفي تلك اللحظة دخلت شابة طويلة القامة نحيلة القد رشيقة القوام ذت شعر اسود جميل وذات وجه منير حاملة معها قليلا من الكتب والدفاتر .(( البنت حلوة لزم الوصف ))

صباح الخير ياما كيفك عمتي أم سهيل  وكيفو عمي بو سهيل

ام سهيل :    يا تقبريني صباح النور يا عمتي يسلملي هالوجه تعالي هاتي بوسه

أم الياس :   وين رايحة ياما على الجامعة

هالة :  ايه ياما بدك شي

ام سهيل :    ولك اصحك من الطريق قال عم يقولو في انفلونزا  بالبلد مش مخليه حدا يمرق غير ما بتلبسو من فوق لتحت.

تضحك هالة بكثير من الحنان

هالة :  صبيلي كاسة متى لاحكيلكن كيف فينا نخلص من هل المرض

هالة : اول شي يا عمتي هادا مرض متلو متل أي مرض تاني بس بيجوز اقوى شوي يعني مش لازم نخاف كتير منو

تاني شي هو صحيح كتر بالعالم متل ما بتسمعو بالاخبار بس بشوي وعي منا ما منخلي يدخل على بيوتنا ولا على حياتنا .

ام سهيل:  ( كراسيا ) كيف يا عمتي وعم يقول عمك ابو سوهيل انو في اصابات كتير بالبلد .

 هالة : يا عمتي نحنا والحمد الله شعب مثقف وكتير بيفهم مشان هيك مش لازم نخاف من الشائعات و الاوهام  و لازم نحمي حالنا وأولادنا ولازم نوعا ونوعيهن كرمال ما ينتقل المرض لالنا

أم الياس: وقد جمعت / المطيطة التى في شعرها / وهي مفتخرة بكلام ابنتها :

وكيف ياما لازم نعمل هيك

هالة: اول شي ما نسمع للإشاعات الى عم تنحكا بالبلد هلايومين  لانها كترانه شي بقلك بدهن يسكرو مدارس وشي  بدهن يعقمو وشي بقول انو حوالينا المستشفيات معبايه  وبعدين لازم نعلم ولادنا ما ياكلو من الاكل المكشوف ولا يشربو من حدا مين ما كان يكون ولازم بالمدرسة يغسلو ايدهن كل ما لعبو او استعلوا شي بيخص غيرهن ونحنا كمان مش لازم تكون سلامنا على بعض كتير حار (( مباوسة يعني )) بلاهاخففوها ولازم نحافظ على نضافتنا الشخصية كتير منيح .

تقاطعها ام سهيل

ام سهيل :    يا باري انا فيني شوف امك الصبح وما بوسها تقبرني مهي متل اختي

هالة  : يا تقبريني يا عمتي شو فيها // قعدو سوا بس بلاها البوسه لانو يمكن تكوني مرضانه ومش عارف او هي تكون مرضانة ومش دريانه وبعدين كاسة المته يعني خففوها شوي واذا لابد  شربو كل واحدة بمصاصه

أم الياس: ييييي بدك الناس تحكي علينا

هالة: بالأخير هاد المرض متلو متل أي مرض لازم نحمي حالنا ونتوقى منو ونحافظ على نظافتنا ونظافة بيوتنا هيك مخلص منو ومن شرو

هلق انا اتأخرت اسمحولي بدي روح /// باي ///

ام سهيل: باي ( ييي على بنات اليوم قال باي )) كيف صايرين

أم الياس: يختي فهمتي شي من الى قالتو  هالة

ام سهيل  : ولك ايه قال كل الى سمعناه هو تكبير  لشائعة المرض ومشان هيك المرض موجود مافينا نلغيه بس لازم نتحرص يختي منو ونعلم كل الى حوالينا كيف لازم يتعاملو ويحمو نفسهم مشان ما ينصابو //

هي بنتك عنجد فهمانه

أم الياس: ترفع صدرها بساعديها لكان يختي مهي سنه تانية جامعة لكان

ام سهيل: يعني هلق صار الي حجة لابو سهيل ما يبوسنى وهو رايح على الشغل ...

أم الياس:  يبعتلك ...

وتتعالى الضحكات والهمهمات وتتابع حسن ودرة  حديث الصباح الشيق وشرف فنجان قهوة وما على بالهن بال  

وتستمر الحكايه

Shady

عنوان التعليق*:

اسم الكاتب*:

نص التعليق*: